Showing posts with label ایک عورت کئی کہانیاں (مختلف آپ بیتیوں اور کہانیوں کا نیا سلسلہ ). Show all posts
Showing posts with label ایک عورت کئی کہانیاں (مختلف آپ بیتیوں اور کہانیوں کا نیا سلسلہ ). Show all posts

Friday, 25 October 2019

خود نمائی یا خدا نمائی(قسط نمبر 2)

جب گاوں کی فضاوں میں تاریکی گہری ہو گئی اور صاف آسمان پر تارے ٹمٹمانے لگے تو پہلی بار مہرالنساء کے گھر والوں نے مہرالنساء کو اس گھرانے میں جیتی جاگتی ایک فرد کے طور پر سوچنا شروع کیا۔ اب اس کی ماں اور بہن بھائی فکر مند ہوئے ۔ سوتیلے بھائی سے طرح طرح کے سوال ہونے لگے ۔ دونوں کی مائیں ایک دوسرے کو طعنے دینے لگیں ۔ مہرالنساء کی ماں کو شک گزرا کہ اس کے شوہر کی پہلی بیوی کا بڑا لڑکا اس کی مہرالنساء کو کہیں مار کر پھینک آیا۔ وہ دہائیاں دے رہی تھی۔ گاوں سارا جمع ہوگیا۔ لوگ ہاتھوں میں لاٹھیاں ٹارچ اور بڑی بیٹری لائٹس (جن سے سارا کھیت روشن ہوسکتا ہے) لئے کھیتوں کی طرف نکل گئے تو کچھ لڑکے گھر گھر جاکر تلاش کرنے لگے ۔لیکن مہرالنساء نہ ملی۔
صبح نمودار ہوچکی تھی۔ مہرالنساء کی ماں سر پہ دوپٹہ باندھے اب تھکن اور غم سے کراہ رہی تھی۔ اسے یقین ہوچلا تھا کہ مہرالنساء مر چکی اور گاوں کے آوارہ کتے اور جنگلی سور اب تک اس کی اس بیٹی کو چیر پھاڑ کر کھا چکے ہوں گے جسے کبھی اس نے دوگھڑی غور سے دیکھا بھی نہ تھا۔اب جب وہ اپنی بچی کے بارے میں سوچ رہی تھی تو اسے اس کے خدوخال بھی ٹھیک طرح سے ذہن میں نہ ابھرتے تھے ۔ اسے یاد ہی نہ تھا کہ مہرالنساء نے کس رنگ کے کپڑے پہنے ہوئے تھے۔پیر میں جوتی بھی تھی کہ نہیں ؟ اس کے بال کتنے لمبے تھے اور کس رنگ کے تھے؟
جب گاوں کی عورتیں سوال کرتیں تو وہ سوچ میں پڑ جاتی کہ مہرالنساء کی عمر کیا ہوگئی؟ اس کا قد کتنا تھا؟ آج مہرالنساء کی ماں پہلی بار سارے کام دھندے چھوڑ کر بیٹھی صرف اس کے بارے میں سوچ رہی تھی اور دعا کررہی تھی کہ ایک بار مہرالنساء مل جائے تو وہ اسے خود نہلائے گی اس کی کنگھی کرے گی اسے پیار کرے گی اسکی باتیں غور سے سنے گی اور پوچھے گی کہ اسے کیا کھانا پسند ہے۔اس کی پلیٹ میں بوٹیاں ڈالے گی اور اپنے ہاتھ سے اسے کھانا کھلائے گی ۔ آج مہرالنساء کی ماں دل میں عہد کررہی تھی کہ ایک بار اللہ اسے مہرالنساء لوٹا دے تو وہ اسے اپنے ساتھ سلائے گی جہاں روز اس کے دو (مہرالنساء سے چھوٹے)لڑکے اور ایک دودھ پیتی بچی سوتے تھے۔ اسے دکھ ہورہا تھا کہ اس نے پیدا ہونے کے بعد سے  کبھی مہرالنساء کو ساتھ نہ سلایا تھا۔ دودھ پیتی مہرالنساء کو اس نے دودھ بھی جلدی چھڑوا کر بوڑھی دادی کے حوالے کردیا تھا۔ ماں بچاری بھی کیا کرتی ۔آٹھ بچوں کی فوج اور شوہر انتہائی سخت مزاج ،اس پر گھر کی زمداری اور کھیت کھلیان بھی اس کے سر تھے۔
وہ سوچ سوچ کر نڈھال ہورہی تھی۔  مہرالنساء کے لئے ہمیشہ سے سوئی ہوئی ممتا آج جاگ گئی تھی اور تڑپ رہی تھی۔ 
گاوں کے لوگ اب گھروں کو پلٹ رہے تھے۔ سارے کھیت کھلیان چھان مارے اور گھر گھر تلاشی کے بعد اب لوگ مایوس ہوگئے تھے۔ البتہ حیران ضرور تھے کہ آخر گاوں میں کہیں کوئی نشان کیوں نہیں ملا۔ اگر کسی درندے نے مہرالنساء کو کھایا تو خون کہیں نظر نہ آیا اس کا کوئی کپڑا نہ ملا۔ کسی نے بھی کوئی مشکوک چیز نہ دیکھی ۔ اب تو لوگ جنوں بھوتوں کی باتیں کرنے لگے۔ گاوں میں خوف و ہراس پھیلنے لگا تھا کہ شاید مہرالنساء کو کوئی جن بھوت اٹھا کرلے گئے ۔ 
ماسی زرینہ نے مہرالنساء کی ماں کو تھپکی لگائی: چل اٹھ اب جاکر دو گھڑی سو جا ۔ رب کی رضا سمجھ۔ مہرالنساء اب نہیں آئے گی۔ اس چھوٹے سے گاوں میں اس کا سراغ نہ ملا تو اس کا مطلب یہی ہے کہ زندہ نہیں ۔" ماسی نے بنا سوچے سمجھے وہ کہہ دیا جو سب سوچ رہے تھے۔ مہرالنساء کی ماں یہ سن کر مزید غمگین ہوگئی۔
"آپا تو فکرنہ کر صبح تڑکے ویلے ہم ایک بار پھر گاوں کے سارے کنوئیں چیک کریں گے کہ کہیں کسی خالی کنوئیں میں نہ گر گئی ہو اور ساتھ والے گاوں کی مسجد میں اعلان بھی کروا دیں گے ۔ بچی ہے شاید کہیں ادھر کسی کے ساتھ چلی گئی ہو۔" مہرالنساء کا ماموں نوکری سے چھٹی پہ آیا ہوا تھا اور اپنی غم سے نڈھال بہن کو دلاسہ دے رہا تھا۔
مہرالنساء کی ماں: ہائے نذر۔۔۔ میری بچی کیوں جائے گی کسی کے ساتھ؟ اب وہ ہاتھ ملنے لگی ۔مجھے پتا ہے کہ وہ ادھر ہی ہے کہیں بس تو ڈھونڈ اسے ۔۔ نذر ڈھونڈ میری مہرالنساء کو ۔۔ وہ آنسو بہانے لگی تو نذرپریشان ہوگیا اور سر ہلاتا ہوا باہر نکل گیا ۔ فجر کی اذان ہوچکی ۔ مہرالنساء کی ماں کراہتی ہوئی مشکل سے اٹھی اور وضو کرنے لگی ۔
 مہرالنساء کا گھرانہ خاصا دیندار گھرانہ سمجھا جاتا تھا۔ یہ لوگ دوسروں کے ساتھ معاملات میں اچھے سمجھے جاتے تھے اسی لئے آج مہرالنساء کی تلاش میں سارا گاوں نکل آیا کہ کسی نہ کسی بہانے سبھی اس گھرانے کے مقروض تھے۔
مہرالنساء کی ماں نماز پڑھ کر خوب روئی اور اللہ سے معافی مانگنے لگی کہ ایک بار مہرالنساء مل جائے تو وہ کبھی اس کی حق تلافی نہ کرے گی ۔ اسے شدت سے احساس ہورہا تھا کہ اس نے مہرالنساء کے ساتھ زیادتی کی تھی کہ کبھی اس معصوم بچی کو توجہ ہی نہ دی تھی ۔ وہ گڑگڑاکر دعائیں کررہی تھی اور وہیں جائے نماز پر سجدے میں ہی اس کی آنکھ لگ گئی۔ 
مہرالنساء کا پر دادا بہت نیک آدمی تھا۔ حکمت بھی جانتا تھا اور گاوں والے اس کے پاس دوا کے ساتھ ساتھ دعا کے لئے بھی آیا کرتے تھے وہ اکثر کہا کرتا تھا کہ جب اولاد کسی مصیبت میں ہو تو ماں باپ میں سے کوئی دو نفل استغفار بعد از نماز عشاءپڑھے تو اس کی اولاد کے سر سے مصیبت ٹل جاتی ہے۔ 
مہرالنساء کی ماں نے بھی ندامت سے رات نفل پڑھے اور اللہ سے معافی مانگی۔وہ خود کو قصور وار سمجھتی تھی کہ اس نے کبھی مہرالنساء کا خیال نہ کیا اور اللہ کی نعمت کی قدر نہ کی تھی ۔ اب وہ فجر کی نماز پڑھ کر وہیں سو گئی تھی ۔ اس کے سارے بچے اس وقت سو رہے تھے ۔ مہرالنساء کی بڑی بہنیں اب جوان تھیں اور گھر کے کام کاج میں ماں کا ہاتھ بٹاتی تھیں۔ 
سورج نکل آیا تو مہرالنساء کی بڑی بہن سمیرا نے آکر ماں کو جگایا۔ " "اماں اٹھ جا ، چائے پی لے" سمیرا ہاتھ میں چائے کی پیالی لئے کھڑی تھی ۔ مہرالنساء کی ماں کا بدن ٹھنڈ سے اکڑ رہا تھا وہ اٹھ بیٹھی۔ چائے کی پیالی ہاتھ میں لے کر اس نے کہا۔
"سمیرا میری مہرالنساء کا کوئی سراغ ملا؟ "
سمیرا نے ماں کو سہارا دے کر اٹھایا۔اس نے چائے دو گھونٹ میں ہی پی لی تھی۔ سمیرا نے خالی پیالی اس کے ہاتھ سے لے لی۔
"اماں مل جائےگی مہرالنساء وہ کسی سہیلی کے گھر چلی گئی ہوگی ۔ پہلے بھی تو آمنہ کے گھر رات سو جاتی تھی اب بھی کسی کے ساتھ کھیلتے کھیلتے سو گئی ہوگی ۔ " سمیرا ماں کو تسلی دے رہی تھی اور خود بھی دل ہی دل میں دعا کررہی تھی کہ اس کی بات سچ ہوجائے ۔
مہرالنساء کی ماں اٹھی اور دوسرے بچوں کو دیکھنے لگی۔ سارے کمروں میں پھرتی ہوئی جب وہ اناج کے کمرے میں گئی تو اس چھوٹے سے کمرے میں ایک طرف دیوار کے ساتھ رکھی گندم کی بوریوں پہ پڑی خالی بوریوں کا ڈھیر اسے کچھ عجیب سا لگا۔ وہ ڈرتے ڈرتے آگے بڑھی ۔اس کے دل میں وسوسے جنم لینے لگے ۔ اللہ سے خیر کی دعا مانگتی اس نے ہاتھ بڑھایا۔اس کے دل کی دھڑکن تیز سے تیز تر ہوتی گئی جونہی اس نے بوریاں ہٹائیں بے اختیار اس کے منہ سے ایک چینخ بلند ہوئی ۔ 


Tuesday, 8 October 2019

مرد کی نازک اَنَا

میری منگنی میرے خاندان کے ایک بہت ذہین اور مال دار نوجوان سے کردی گئی ۔ مجھے پڑھنے کا شوق تھا اس لئے میں نے شادی سے پہلے تعلیم مکمل کرنے کی شرط عائد کردی۔  پہلے پہل تو میرے منگیتر نے کوئی اعتراض نہ کیا مگر چھ ماہ بھی نہ گزرے تھے جب انہیں شادی کی جلدی ہونے لگی ۔ 
میری ہونے والی ساس مجھے اتنا زیادہ پسند نہ کرتی تھیں اور اس کا سبب یہی تھا کہ میرا منگیتر ان کا اکلوتا بیٹا تھا۔ وہ چاہتی تھیں کہ اپنے خاندان سے کسی کو بہو بنا کر لائیں لیکن ان کے بیٹے کا دل مجھ پہ آگیا تھا اس لئے وہ اپنی ضد پہ اڑا رہا ۔ 
میری طبیعت میں انکساری تھی اس لئے ان کی دولت نے مجھے کبھی متاثر نہ کیا تھا۔ جب میری منگنی ہوئی تو میرے اپنے خاندان کی بے شمار لڑکیاں جل گئیں اور ان کی مائیں ٹھنڈی ٹھنڈی آہیں بھرنے لگیں کہ کاش ان کی بیٹی ایسے مال دار گھرانے سے منسوب ہوئی ہوتی ۔
منگنی پہ مجھے سونے کے زیورات اور دنیا بھر سے قیمتی کپڑے ساڑھیاں اور دیگر سامان تحفتا دیا گیا ۔جب کوئی مجھے کہتا کہ یہ سیٹ بہت خوبصورت ہے تو میں کہتی اچھا تو آپ لے لیں اگر آپ کو ایسا پسند ہے ۔ لوگ میری فیاضی پہ حیران بھی ہوتے اور بعض لوگ مجھے بیوقوف بھی کہتے تھے ۔ لیکن سچ یہی ہے کہ مجھے مادی چیزیں کبھی متاثر نہ کرتیں تھیں ۔ میرے دل میں اس وقت میرے منگیتر کے لئے کوئی جذبات نہ تھے بس جیسے میرے والدین نے فیصلہ کیا میں نے خاموشی سے قبول کرلیا۔
میرے سسرال والے دوسرے شہر رہتے تھے اور منگنی کے بعد انہوں نے 3سال کے لئے مجھے اجازت دی کہ میں اپنا گریجویشن مکمل کرلوں ۔ اس دوران میرے منگیتر بنا مجھے بتائے میرے لئے شاپنگ کرتے رہے۔ 
ایک روز میرے دروازے پر پھول اور چاکلیٹ لئے کورئیر سروس کا اہلکار کھڑا تھا ۔ تو دو دن بعد پھولوں کے ہمراہ میرے لئے کوئی سوٹ بھجوارہے ہوتے ۔ چند روز تو میں نے قبول کیا پھر اپنی امی سے کہلوایا کہ مجھے بھائیوں کے سامنے ایسے گفٹ وصول کرتے شرم آتی ہے اس لئے مت بھیجا کرے ۔ 
امی نے یہ بات تو کہہ دی کہ زیادہ گفٹ نہ بھیجیں ابھی تو صرف منگنی ہوئی ہے لیکن میرے منگیتر اور ان کی امی نے بہت برا منایا ۔ کچھ روز انہوں نے گفٹ نہ بھجوائے لیکن پھر خط آنے لگے ۔ محبت بھرے خطوط میرے لئے ایک نیا عذاب تھا۔ میرے حسن اور خدوخال کا کھل کا اظہار تھا ان میں۔ مجھے خوف آنے لگا کہ کسی روز میرے بھائیوں نے یا ابو نے اگر کوئی خط پڑھ لیا تو کیسی سبکی ہوگی ۔ اس لئے پھر ایک بار میں نے امی سے کہلوا بھیجا کہ ایسے رومینٹک خط نہ لکھیں ۔ اس کے بعد نہ خط آئے اور نہ کبھی وہ خود آئے ۔ چند ماہ گزر گئے اور پھر سنا کہ میری شادی کی باتیں چل رہی ہیں ۔ میں نے احتجاج کیاکہ میں نے ابھی صرف  ایف ایس سی کیا ہے ابھی مجھے مزید پڑھنا ہے لیکن میری ہونے والی ساس نے پیغام بھیجا کہ اتنی مال و دولت والے خاندان کی بہو بننے والی نہ بھی پڑھے تو کیا قیامت آجائے گی ہم نے کون سا نوکری کروانی ہے اور اگر پھر بھی پڑھنے کا بہت شوق ہوا تو شادی کے بعد دونوں بیرون ملک اعلی تعلیم کے لئے چلے جانا ۔ 
ایک سال بھی نہ گزرا تھا منگنی کو جب میری شادی بہت دھوم دھام سے کردی گئی ۔ میں خوش تو نہ تھی لیکن اب اسے خدا کی رضا سمجھ کر خاموش رہی۔
شادی کے روز میرے شوہر کی کلاس فیلوز اور گرل فرینڈز بھی ان کے ساتھ ڈانس کررہی تھیں ۔ مجھے تو کوئی فرق نہ پڑا لیکن میرے ابو نے بہت برا محسوس کیا اور پھر میرے گھر والوں نے محسوس کیا کہ میرے سسرال والوں کا رویہ بھی ان کے ساتھ آج کچھ مناسب نہیں۔ 
جب رخصتی ہورہی تھی تو میرا دل بہت گھبرایا اور میں بہت روئی ۔ میرے شوہر کو یہ بات بہت ناگوار گزری اور ان کے چہرے کے تاثرات دیکھ کے مجھے جلدی جلدی رخصت کردیا گیا ۔
میں اپنے والدین کی پریشانی سمجھ سکتی تھی لیکن اب خود کو بے بس محسوس کررہی تھی ۔ ایک عورت ایسے وقت کر بھی کیا سکتی تھی ۔ ہم جہاز کے ذریعے دوسرے شہر آگئے جہاں میرے شوہر کے گھر یعنی میرےسسرال پہنچ کر بہت دیر تک میری ساس نے لمبی چوڑی رسمیں کیں اور جب میں بہت تھک گئی تو مجھے میرے کمرے میں چھوڑ آئے ۔ 
میں عالی شان کمرے میں پھولوں کی سجی سجائی سیج پر اپنے شوہر کا انتظار کررہی تھی۔لیکن وہ نہ آئے ۔ رات گزرتی رہی میں بیٹھی بیٹھی تھک گئی ۔ تنہا تھی ۔ پیاس لگ رہی تھی ۔ بھوک بھی لگ رہی تھی کیونکہ شادی کی گہما گہمی اور ماں باپ کی اداسی دیکھ کر میں کچھ بھی کھانے سے قاصر رہی ۔ اب کمرے میں تنہا بھوکی پیاسی بیٹھی تھی اور کسی نے  آکر مجھے پوچھا تک نہیں۔
صبح کا وقت تھا جب میرے کمرے کا دروازہ کھلا اور میرے شوہر کمرے داخل ہوئے ۔ میں تھکاوٹ سے بے حال تھی اور کچھ نیند میں جا چکی تھی ۔ 
میں جلدی سے سنبھل کر پھر سے دلہن والی پوزیشن میں بیٹھ گئی ۔ میرے شوہر نے ایک طرف رکھے میوزک پلیئر کو آن کیا اور پھر وہ میرے پاس آئے۔
"کبھی کبھی میرے دل میں خیال آتا ہے ۔۔۔۔ " کمرے میں گانے کی آواز گونجنے لگی۔جب گانے کے بول میں گھونگھٹ اٹھانے کا ذکر آیا تو انہوں نے گانے کے بول ساتھ میرے چہرے سے گھونگھٹ اٹھایا ۔ میں نے شرما کر مزید سر جھکایا تو انہوں نے میرے چہرے کو چھو کر میرا منہ اوپر کیا۔ میں نے نگاہیں اٹھائیں تو وہ پوری دیوانگی سے مجھے دیکھ رہے تھے ۔ حیا سے میری نگاہیں پھر جھک گئیں۔وہ بہت خوبصورت مگر تھکے ہوئے نظر آرہے تھے۔ وہ آگے بڑھے اور جیسے جیسے گانے کے بول چھونے کا ذکر کرتے وہ یونہی مجھے چھونے لگے ۔ پھر انہوں نے میرے بدن سے لباس الگ کرنا شروع کردیا۔ 
رات بھر انہوں نے مجھے سر سے پاوں تک دیوانوں کے طرح چوما۔ صبح جب میں غسل کرنے لگی تو میرے سفید نازک بدن پہ ان کی دیوانگی اور پیار کے نشان مجھے پریشان کررہے تھے کہ انہیں کیسے دوسروں کی نگاہوں سے چھپاوں گی۔ 
عورت کے بدن پہ نشان ہوں یا کردار پہ داغ ، ہمارا معاشرہ دونوں صورتوں میں اس کو جینے نہیں دیتا جب کہ اس کا موجد مرد ہمیشہ بری الذمہ رہا۔
میں جب نہا کر واپس کمرے میں آئی تو وہ کمرے میں نہ تھے ۔ میں نے سوچا کہ شاید اٹھ کر نہانے چلے گئے ہوں ۔ میں نے دوسرے دن کے کپڑے نکالے اور تیار ہونے لگی ۔ اچانک میری نظر بیڈ پہ پڑے سفید لفافے پر پڑی۔ 
میں نے کانوں میں جھمکے ڈالتے ہوئے لفافہ اٹھایا  تو وہ ایک کاغذ تھا ۔ پہلے سوچا کہ شاید میرے شوہر کا کوئی کاغذ ہوگا نہ کھولوں لیکن پھر خیال آیا کہ ہوسکتا ہے میرے لئے کچھ لکھ کر گئے ہوں ۔
میرا اندازہ درست تھا ۔ وہ کاغذ کا ٹکڑا میرے لئے ہی تھا ۔ میرے شوہر نے منہ دکھائی دی تھی اور وہ تھی ۔۔۔
طلاق ۔۔۔ طلاق ۔۔۔ طلاق !